Gebreekte takke van 'n familieboom

Wie is jy as mens ... Wat maak jou hart bollemakiesie slaan en wat ruk jou tot in jou diepste?

So drie jaar terug, dalk bietjie langer, het ek begin navorsing doen oor ons familieboom. Omtrent 'n ingewikkelde storie. As ons land maar net meer inligtingsbronne gehad het. Die storie 'Who do you think you are?' laat dit so maklik lyk, maar begin jy navorsing doen moet jy hier dit en daar dat betaal.

Dit laat my wonder hoekom dit dan is dat daar so 'n groot onskatbare waarde aan die manlike gesag gekoppel word? Die mans dra die van voort en dan nie te praat van die trots wat ervaar word met die geboorte van 'n seun nie. Dit is egter die man wat bepaal wat die geslag is van die baba.

Ek het hard gebid vir 'n seun en met die geboorte van my tweede dogter, besef ek sal op 'n manier moet vrede maak dat ek nie 'n seun vir my man sal kan gee nie. Daar word gese dit maak nie saak nie, maar diep binne my weet ek wat sy hartsbegeerte is ... naas 'n Suzuki motorfiets, hooggeprysde Audi en Volkswagen voertuig natuurlik.

Hoekom is dit dat die vroulike geslag dan so min geag word tot ons kinders moet baar vir ons mans? Nou nie dat dit die enigste rede is waarvoor mans ons aansien nie.

Vandag kan die vrou aandring om haar nooiens-van te behou, maar watter uitwerking het dit op die familiebome? Selfs dieselfde geslag troues ...

Dit laat my wonder hoe familie-bome van die toekoms gaan lyk. 'n Warboel van takke en 'indringers' ... Dis nou aannemings waarvan ek praat. Nie dat aanneming 'n slegte ding is nie.

'n Familieboom met al sy takke word tog een of ander tyd gesnoei om plek te maak vir nuwe 'bome'. Nie dat die plek geneem kan word van die boom waar hy gestaan het nie.

Wanneer jou boom gesnoei word of uitgepluk word met wortel en al, iewers in die toekoms sal dit weer vir een van ons nasate saakmaak waar hul vandaan kom ... En ook wonder wie hul voorvaders is ... So die wortels van jou familieboom sal weer 'nuwe' lewe en betekenis kry, met gebreekte takke en al.
Sent via my BlackBerry from Vodacom - let your email find you!